بسم اللہ الرحمن الرحیم
نَحمدُہْ وَنصَلَی عَلٰی رسُوْلہ الکریْم
عزیز مولوی محمد شاہد سلّمہ بعد سلام مسنون ، کئی سال ہوئے تم نے مجھ پر اصرار کیا تھا کہ میں اس اعتراض کا جواب لکھوں کہ ان علماءِ دیو بند کے درمیان اپنے اکابر کے ساتھ جو عقیدت ہے وہ کہیں دوسری جگہ نہیں پائی جاتی ۔ ان علماء کے اکابر کے بظاہر خلا ف شرع اگر کوئی کچھ لکھے تو یہ تکفیر تک پہنچا دیتے ہیں اور جب معلوم ہوا کہ یہ الفاظ تو انہیں کے اکابر کے ہیں تو اس کی تاویلیں کر تے پھرتے ہیں ۔ میں نے تمہارے اس اعتراض کو باوجود تمہارے اصرار کے توجہ کے قابل نہیں سمجھا اور اپنے مشاغل کو ان فضولیات کی وجہ سے چھوڑنا نہیں چاہا ۔ میں نے اس قسم کا فقرہ تو بہت بچپن میں جب میری عمر غالبًا دس برس کی تھی حضرت قطب الارشا د حضرت مولانا رشید احمد صاحب قدس سرہ اعلی اللہ مراتبہ کے انتقال پر جو حضرت شیخ الہند نے مرثیہ لکھا تھا اور میرے والد صاحب نو اللہ مر قدہ نے کئی ہزار چھپوایا تھا اور خوب مفت بانٹا تھا مجھے بھی قریب قریب سب یاد تھا اور خوب مزے لے لیکر پڑھا کرتا تھا اور میرے کان میں یہ پڑا کرتا تھا کہ دیکھو اگر یہ شعر ہم کہیں تو ہم کافر ہو جائیں مگر چونکہ شیخ الہند نے کہہ دیا اس لئے کوئی اس پر لب کشائی نہیں کرتا اور میں ان فقروں کو سن کر یوں دل کو سمجھا لیا کرتا تھا کہ یہ جاہل آدمی ہیں حضرت شیخ الہند نور اللہ مر قدہ کی جوتوں کی خاک بھی نہیں ہو سکتے یہ حضرت کے کلام کو کیا سمجھیں ۔ اس کے بعد جب میری عمر تقریباً ١٢برس کی تھی اور والد صاحب نو ر اللہ مرقدہ کے ساتھ سہار نپور آیا تو میرے والد صاحب کا معمول یہ تھا کہ مدرسہ کے وقت کے علاوہ جو وقت گذرتا وہ موچیوں کی مسجد میں گذارا کرتے تھے ، البتہ آرام گھر پر کیا کرتے تھے ۔ اُس زمانہِ کے طالب علم قابل رشک تھے ۔ وہ اُستادوں کی خدمت کو عبادت سمجھا کرتے تھے ، کوئی خدمت کسی اُستاد کی ہو جائے تو اُن کے لئے موجب فخر تھی ۔ آج کل کے روشن خیالوں کی طرح سے نہیں تھے جو یوں سمجھتے ہیں کہ ان اساتذہ کو میری بدولت ہی تنخواہیں اور روٹیاں مل رہی ہیں ۔ وہ گرمی کا زمانہ تھا ۔ ایک مرتبہ میرے والد صاحب عصر کے بعد موچیوں کی مسجد میں کنوئیں کے قریب تشریف فرما تھے اور دو تین ولایتی طالب علم کنوئیں پر کھڑے ہوئے دما دم کنوئیں سے ڈول کھینچ کر والد صاحب پر ڈال رہے تھے ۔ ایک ختم نہیں ہوتا تھا کہ دوسرا شروع ہو جاتا تھا ۔ مولوی امداد کے والد حافظ مقبول مرحوم بھی میرے والد صاحب کے معتقدین میں تھے اور وہ بھی اکثر عصر کے بعد وہاں چلے جایا کرتے تھے ، وہ کہنے لگے حضرت جی ! یہ اسراف نہیں ۔ میرے والد صاحب نے فرمایا تمہارے لئے اسراف ہے میرے ئے نہیں ۔ انہوں نے فرمایا کیا بات ؟ والد صاحب نے فرمایا تو جاہل اور میں مولوی ۔ حافظ جی نے کہا یہ تو وہی بات ہوگئی جو لوگ کہیں کہ یہ مولوی اپنے واسطے ہر چیز کو جائز کر لیں ۔ میرے والد صاحب نے کہا کہ مولوی تو اس فقرہ پر خواہ مخواہ شرمندہ ہوں ۔ وہی کام تم اگر کرو تو نا واقفیت کی وجہ سے گناہ ہو گا اور مولوی اسی کام کو جائز کر کے کرے گا ۔ انہوں نے وجہ پوچھی تو میرے ابا جان نے فرمایا کہ عربی پڑھو ۔ یہ تو تمہیں بھی یاد ہو کہ میرے والد صاحب کا عام مقولہ تھا ۔ کہ یہ مشغول لوگ بالخصوص وکلاء یا انگریزی اسکولوں کے ماسٹر مجھے ٧٢ گھنٹے دیں تومیں انہیں مولوی بنا دوں ، اور یہ تفریحی فقرہ نہیں تھا بلکہ ان کے نصاب کے پڑھے ہوئے کئی وکلاء اس زمانہ کے اس سے بھی کم وقت میں اچھے خاصے مولوی ہوگئے وہ ٧٢ گھنٹے مسلسل نہیں مانگتے تھے بلکہ ہر اتوار کو دو گھنٹے مانگتے تھے ۔ اور ان دو گھنٹوں میں اتنا کام ان کے سپرد کر دیتے تھے کہ اگلے اتوار تک اس کو یاد کر کے لائو ۔ اس زمانہ کے مشہور وکیل مولوی شہاب الدین مولوی منفعت علی صاحب کو تو شاید تم نے بھی سنا ہو ، سہار نپور کے لیگ کے صدر ، حضرت تھانوی کے مجاز صحبت ، میرے مخلص دوست ، اب تو وہ بھی پاکستان جانے کے بعد مرحوم ہو چکے ۔ بیچ میں بات آگئی ، مگر اس کے نظائر بہت تھے اور مولوی شبیر علی صاحب مرحوم نے ، اکمال انشیم ، کے مقدمہ میں جو خط لکھا ہے اس میں اس طرزِ تعلیم کا بھی ذکر کیا ہے ۔ حافظ مقبول اصرار کرتے رہے اور میرے والد صاحب اصرار کرتے رہے کہ عربی پڑھو مولوی ہو جائو گے ، اُس وقت تو یہ اسراف والا مسئلہ میرے بھی سمجھ میں نہیں آیا ، مگر جب مشکوٰة شریف پڑھی اور بابُ الربواٰ میں حضرت ابو سعید خدری رضی اللہ عنہ کی حدیث جس میں ذکر کیا ہے کہ :
حضرت بلال رضی اللہ عنہ حضور اقدس صلی اللہ علیہ وسلم کی خدمت میں برنی کھجوریں لائے جو بہت عمدہ ہوتی ہیں ۔ حضور صلی اللہ علیہ وسلم نے فرمایا یہ کہاں سے لائے ؟ اُنہوں نے فرمایا میرے پاس گھٹیا کھجوریں تھیں ، اس میں سے دو صاع ( ایک پیمانہ ہے ) کے بدلہ میں یہ ایک صاع بڑھیا خرید لیں ۔ حضورِ اقدس صلی اللہ علیہ وسلم نے فرمایا ۔ ہائے ہائے یہ تو عین سود ہو گیا ۔ حضور صلی اللہ علیہ وسلم نے فرمایا ، ایسا کبھی نہ کیجئے ، اگر ایسا کرنا چاہو تو ردی کھجوروں کو داموں سے فروخت کر دو اور ان داموں سے عمدہ کھجوریں خریدو ۔ "اس وقت معا مجھے موچیوں کی مسجد کے ڈول یاد آئے کہ مولوی اور جاہل میں یہ فرق ہے کہ دو صاع ردی تمر کے بدلہ میں ایک صاع عمدہ کھجور خریدنی یقینا عین ربواٰ ہے ، لیکن جو ترکیب حضور صلی اللہ علیہ وسلم نے بتلائی کہ ان ردّی کھجوروں کو مثلاً ایک روپیہ میں بیچ دو اور اسی ایک روپیہ سے عمدہ کھجوریں ان سے آدھی خرید لو ۔ بات تو ایک ہی رہی کہ جاہل آدمی اگر دو ٢ صاع گھٹیا کھجور کے بدلہ میں ایک صاع خرید لیگا تو عین ربوا ہوگا اور مولوی گھٹیا دو صاع کھجوروں کو ایک روپیہ میں بیچ کر اس ایک روپیہ کی عمدہ کھجوریں ایک صاع خرید لے تو یہ ربوٰا نہیں رہا ۔ دیکھنے میں تو بات ایک ہی رہی کہ صاع گھٹیا کھجوروں کے بدلہ میں ایک صاع عمدہ مل گئیں مگر حضورِ اقدس صلی اللہ علیہ وسلم نے جو ترکیب بتلا دی اُس پر مولوی ان گھٹیا کھجوروں کو ایک روپیہ میں بیچ کر عمدہ خرید لے تو وہ جائز ۔ اور اُسی وقت سے یہ مضمون خوب ذہن نشین ہو گیا کہ ایک بات عالم کرے تو جائز اور جاہل کرے تو ناجائز ۔ ہمارے مدرسہ کے مہتمم اول حضرت مولانا عنایت الٰہی صاحب نور اللہ مرقدہ بہت ہی بزرگ ، بہت ہی متقی و پرہیز گار تھے ۔ شاید میری آپ بیتی میں کہیں تذکرہ آبھی گیا ہو ۔ وہ مہتمم بھی تھے کہ دارالافتا ء مدرسہ میں مستقل اُس وقت تک قائم نہیں ہوا تھا ،