واحد راستہ
مولانا عبید اللہ خالد
دنیا کی عمر گھٹتی جارہی ہے اور وہ بڑی تیز ی کے ساتھ قیامت کی طرف بڑھتی جارہی ہے۔ یوں لگتا ہے، اس کائنات کے دن گنے جاچکے ہیں اور حدیث نبوی صلی الله علیہ وسلم کے مصداق آپ صلی الله علیہ وسلم کے زمانہ اور قیامت کے وقوع میں دو انگلیوں کا مختصر فاصلہ اب ختم ہونے کو ہے۔
وہ تمام علامات جو خاتم الانبیا آں حضرت محمد صلی الله علیہ وسلم نے گاہے گاہے صحابہ کرام کو بتائی تھیں، گاہے گاہے سبھی پوری ہونے کو ہیں۔ ایک طرف کفار مسلمانوں پر یوں تلے ہوئے ہیں جیسے بھوکا کھانے پر ٹوٹتا ہے تو دوسری جانب مسلمان” وہن“ میں شدید مبتلا دکھائی دیتے ہیں۔ وہن جس کے بارے میں آں حضور صلی الله علیہ وسلم نے فرمایا تھا کہ ایک وقت وہ آئے گا کہ جب مسلمانوں پر کفار یوں یلغار کریں گے جیسے بھوکا کھانے پر ٹوٹتا ہے اور صحابہ کرام نے اس کی وجہ دریافت کی تو آپ صلی الله علیہ وسلم نے وجہ بیان فرمائی کہ اس وقت مسلمانوں میں ”وہن“ غالب آجائے گا، یعنی دنیا کی محبت اور موت سے نفرت۔
اپنے اریب قریب ہی نظر دوڑائیں تو کون ایسا ہے جو مسائل ومشکلات میں گھرا ہوا نہیں او ران سے نکلنے کی نت نئی تدابیر بھی کرتا ہے۔ مگر یہ بات عیاں ہے کہ جوں جوں نئی نئی تدابیر کی جاتی ہیں توں توں مسائل گھمبیر ہوتے چلے جاتے ہیں اور پریشانیاں بڑھتی چلی جاتی ہیں۔
ایک مسئلہ حل نہیں ہوپاتا کہ دوسرا مسئلہ سر پر آن کھڑا ہوتا ہے۔ انفرادی زندگی میں اگر یہ معاملہ شدید ہے تو قوم کی اجتماعی حالت اس ضمن میں قبیح ترین۔ حد تو یہ ہے کہ امت مسلمہ عالمی سطح پر افتاد کا شکار ہے۔
”وقت دُعا“ تو بہت پہلے پڑ چکا تھا، اب اس میں شدید آہ وزاری اور گڑ گڑاہٹ کی گرمائش بھی ضروری ہو چکی ہے۔ امّت کا کثیر طبقہ تو اب بھی اسی شش وپنج میں ہے کہ کیا کیا جائے اور کیا نہ کیا جائے، مگر میرے حبیب حضرت محمد صلی الله علیہ وسلم نے چودہ سو سال پہلے اگر مرض کی پیش گوئی کی تھی تو اس کا علاج بھی تجویز کر دیا تھا۔
آپ صلی الله علیہ وسلم کی ایک حدیث کا مفہوم ہے کہ اس امت کے آخری طبقے کی اصلاح بھی اسی طریقہ سے ہوگی جس طریقے سے پہلے طبقے کو فلاح ملی۔ اس نبوی ہدایت کا سادہ سا مفہوم یہ ہے کہ ہم اپنے حالات ومعاملات کو درست کرنے کے لیے مخلص ہیں تو ہمارے پاس واحد راستہ صرف اور صرف قرآنی تعلیمات اور نبوی اعمال کو اختیار کرنے میں ہے۔ اس کے سوا باقی تمام طریقے سراب ہیں۔ دھوکا اور فریب ہیں۔
انسان مشرق کا ہو یا مغرب کا، مرد ہو یا عورت، کسی بھی مذہب اور کسی بھی خاندان سے تعلق رکھتا ہو، اس کی زندگی میں سکون وراحت اور مسائل ومشکلات سے نجات کا واحد راستہ صرف ”اسلام“ ہے … اسلام ہی میں سلامتی ہے… دُنیا کی سلامتی بھی اور آخرت کی سلامتی بھی!