اُردو ترجمہ نحومیر
بسم اللہ الرحمن الرحیم
تمام تعریفیں اللہ کیلئے ہیں جو تمام جہانوں کا ربّ ہے اور نیک انجام متقی لوگوں کیلئے ہے اوربہترینِ خلائق یعنی حضرت محمد ﷺ پراور اِن کی تمام آل پر درودو سلام ہو ۔
اَمَّا بَعد تو جان لے (اللہ تعالیٰ تجھے سیدھے راستے پر چلائے)کہ علمِ نحو میں لکھا گیا یہ مختصر رِسالہ ہے جو اللہ کی توفیق ا وراس کی مدد سےمبتدی کو لغت کے مُفْرَدات یاد کرنے ، اِشتِقاق کو پہچاننے اور صَرف کی ضروری چیزیں یاد کرنے کے بعد بآسانی عربی ترکیب کی کیفیت کی راہ دکھلاتا ہے اور بہت جلدی مُعْرَب و مَبنی کو پہچاننے اور عبارت صحیح پڑھنے میںقوّت دیتا ہے۔
فصل
تو جان لے کہ عربی زُبان میں استعمال ہونے والے الفاظ دو قسم پر ہیں: مُفْرَد اور مُرکّب ۔ مفرد وہ لفظ ہے جو اکیلا ہو اورایک معنی پر دلالت کرے۔ اس کو” کلمہ“ بھی کہتے ہیں۔ کلمہ کی تین اقسام ہیں: اسم: جیسے رَجُلٌ، فعل :جیسے ضَرَبَ اورحرف: جیسے ھَلْ جیسا کہ صَرف میں معلوم ہوا۔