بسم اللہ الرحمن الرحیم
حرف گفتنی
الحمد للہ وسلام علی عبادہ الذین اصطفی!
اللہ تعالی کا ہزار ہزار شکر ہےکہ سیرت سید احمد شہید کی جلد دوم کو ناظرین کی خدمت میں پیش کرنے کی دیرینہ آرزو پوری ہورہی ہے، اس کتاب کی پہلی جلد غیر معمولی اضافوں کے ساتھ اکتوبر ۱۹۵۸ء میں خواجہ بک ڈپو اردو بازار لاہور کی طرف سے شائع ہوئی تھی، یہ اس کتاب کا چوتھا ایڈیشن تھا، جو فاضل گرامی مولانا ظفر اقبال صاحب کی نگرانی اور اہتمام میں شائع ہوا، مصنف کو دوسری جلد پر نظر ثانی، اس کے اضافہ و تکمیل اور اس کو اشاعت کے لئے آخری طور پر تیار کرنے میں اپنی گوناگوں مصروفیتوں، اور اندرون اور بیرون ملک کے طویل طویل سفروں کے بناء پر خاص دیر لگی، بالآخر ستمبر ۱۹۶۲ء میں اس کا مبیضہ مکمل طریقہ پر لاہور کے چند مخلص احباب کے سپرد کردیا گیا، جو اس کی طباعت و اشاعت کے ایک بڑی دینی خدمت اور سعادت سمجھ کر آرزو مند تھے، یقین واثق تھا کہ یہ جلد قریبی مدت میں شائع ہوجائے گی، لیکن اس کام میں کچھ ایسی رکاوٹیں پڑتیں رہیں، اور چند در چند ایسے حوادث پیش آئے کہ پورے چھ ۶ برس اس کام کی تکمیل میں لگ گئے، ایسے اوقات بھی آئے کہ اس اشاعت سے مایوسی بھی پیدا ہوگئی، لیکن یہ کشتی جس پر یہ متاع گراں مایہ تھی، حوادث وموانع کے تھپیڑے کھاتی ہوئی بالآخر کنارہ لگ گئی، اور مصنف بے مایہ کی ایک بڑی قیمتی بونجی ضائع ہونے سے بچ گئی:
"ولله الأمر من قبل ومن بعد ويومئذ يفرح المؤمنون بنصر الله"
کسی کتاب کے اجزاء کے ترتیب و اشاعت میں اتنا عظیم تفاوت، اور اتنا طویل فصل، تصنیف کے موضوع ومقصد، اور مصنف کے غرض و غایت کے لئے سخت مضرت رساں ہوتا ہے، پھر جبکہ وہ کتاب متفرق مضامین کا مجموعہ نہ ہو بلکہ ایک
تاریخ دعوت و عزیمت جلد 6
صفحہ 1 / 614