عرض ناشر
اَلْحَمْدُ لِلّٰہِ رَبِّ الْعَالَمِیْنَ، وَالصَّلَاۃُ وَالسَّلَامُ عَلٰی أَشْرَفِ الْأَنْبِیَائِ وَالْمُرْسَلِیْنَ، وَعَلٰی آلِہِ وَصَحْبِہِ أَجْمَعِیْنَ، وَعَلٰی مَنْ تَبِعَہُمْ بِـإِحْسَانٍ إِلٰی یَوْمِ الدِّیْنِ۔
اما بعد، کتبِ حدیث میں ’’صحاح ستہ‘‘ کا مرتبہ حدیث کا شغف رکھنے والے کسی بھی فرد سے مخفی نہیں۔ کتاب اللہ کے بعد اُمتِمسلمہ نے جن کتابوں کی سب سے زیادہ خدمت کی وہ یہی چھ کتب ہیں۔ علمائے اُمت نے ان کتابوں کی شرح اور ان کے رجال پر عربی زبان میں سینکڑوں تصانیف سپردِ قلم کی ہیں جن میں سے اکثر آج طبع ہوکر اُمت کے ہاتھوں میں موجود ہیں۔ عربی زبان کے علاوہ ان کتب کی جن دیگر زبانوں میں خاطر خواہ خدمت ہوئی ہے اُن میں اردو بھی شامل ہے، لیکن اردو زبان میں ان کتب کی خدمت محض متنِ حدیث کی شرح تک ہی محدود رہی ہے، کسی نے ان کے رجال و رُوات، نیز ان کے تعارف و علوم پر قلم نہیں اُٹھایا۔
ہماری معلومات کے مطابق اردو کے مکتبہ میں اس نوع کی اَوّلین کتاب حضرت مولانا عبد الرشید نعمانیؔ ؒ کی مایہ ناز تصنیف ’’امام ابنِ ماجہ اور علمِ حدیث‘‘ ہے، جس کا موضوع امام ابنِ ماجہ ؒ کی مایہ ناز کتاب ’’السنن‘‘ ہے۔ اس کتاب میں مولانا ؒ نے ’’کتاب السنن‘‘ کا مکمل تعارف پیش کیا ہے جو کہ مؤلف کے حالاتِ زندگی، مشایخ، تالیفات اور اس کتاب کی علمی خدمات کے بیان پر مشتمل ہے۔ نیز مولانا ؒ نے اس کتاب میںکتابتِ حدیث، حجیتِحدیث اور تدوینِ حدیث جیسے دقیق علمی موضوعات پرسیر حاصل بحث کی ہے۔ اس طرح یہ کتاب صرف ’’سنن ابنِ ماجہ‘‘ کے تعارف پر مشتمل نہیں ہے، بلکہ حدیث شریف سے متعلق اہم اَبحاث بھی اس کتاب میں نہایت ہی سلیس مگر علمی پیرایہ میں بیان کیے گئے ہیں۔
خود مصنف کتاب کے آخر میں فرماتے ہیں:
’’کہنے کو یہ امام ابنِ ماجہ کی سوانح عمری ہے، لیکن درحقیقت یہ تدوینِ حدیث کی تفصیلی تاریخ ہے اور مسلمانوں کی ان جاںفشانیوں کا مرقع ہے جو انھوں نے خدا کے آخری پیغمبر جناب محمد مصطفی ﷺ کی تعلیمات کے ایک ایک حرف کو محفوظ کرنے کے لیے اُٹھائی ہیں، تاکہ امانتِ وحی کی ذمہ داری میں جو اس اُمت کے سپرد کی گئی تھی، کسی قسم کار خنہ نہ آنے پائے اور اللہ کی حجت تمام اہلِ ملل وادیان پر تمام ہوجائے۔‘‘
کتاب کی اہمیت و اِفادیت کو دیکھتے ہوئے ہم نے ارادہ کیا کہ اسے عصرِ حاضر کے طباعتی ذوق کے مطابق تیار کرکے قارئین کی خدمت میں پیش کریں، تاکہ عرصے سے ناپید یہ کتاب نہ صرف زندہ ہوجائے، بلکہ ایک دلکش روپ میں اہل علم کی خدمت میں پیش ہوسکے۔ اس جدید طباعت میں کمپیوٹرائز کتابت کے ساتھ ساتھ درج ذیل اُمور کا اہتمام کیا گیا ہے: