تفسیر ذخیرۃ الجنان ( یونیکوڈ)
حضرت مولانا سرفراز خان صفدر صاحب تفاسیر - یونیکوڈ - غیر موافق للمطبوع AQFS احمدی مسلمان کتب 6348 صفحات
1.5 صفحہ 1 / 6348
صفحہ 1 / 6348
001:001 بِسْمِ اللَّهِ الرَّحْمَنِ الرَّحِيمِ ترجمہ: شروع اللہ کے نام سے جو بےحد مہربان نہایت رحم والا ہے تفسیر: فضائل : اس سورة کا نام سورة الفاتحہ ہے فتح کا ایک معنی کھولنا بھی ہے چونکہ یہ سورة قرآن کریم کو کھولنے والی ہے، اس سے قرآن کریم کی ابتداء ہوتی ہے اس لئے اس کو فاتحہ کہتے ہیں۔ جس طرح کسی شئے کا عنوان ہوتا ہے یہ سورة قرآن کریم کا عنوان ہے اور اس کا نام بھی ہے کہ اس میں سوال کرنے کا طریقہ سمجھایا گیا ہے۔ کسی سے سوال کرنے اور مانگنے کا طریقہ یہ ہے کہ سائل جس سے مانگتا ہے پہلے اس کی تعریف کرتا ہے کہ تم بڑے ہمدردہو، خیر خواہ ہو اور سخی ہو پھر اپنا تعلق بتاتا ہے میں تمہارا شہر دار یا محلہ دار ہوں اور تمہارے زیر سایہ ہوں پھر اپنی کمزوری اور عاجزی کا اظہار کرتا ہے، پھر اپنا سوال پیش کرتا ہے کہ یہ میری ضرورت ہے جو تمہارے سے مانگنے آیا ہوں ۔ اس سورة میں بھی پہلے اللہ تعالیٰ کی تعریف ہے۔ الحمدللہ رب العٰلمین الرحمن الرحیم مٰلک یوم الدین تمام تعریفیں اللہ تعالیٰ کے لئے ہیں جو پالنے والا ہے تمام جہانوں کا بےحد مہربان ہے نہایت رحم کرنے والا ہے جو مالک ہے جزا اور بدلے کے دن کا۔ پھر اپنا تعلق بتایا۔ ایاک نعبدو ایاک نستعین ہم خاص تیری ہی عبادت کرتے ہیں اور خاص تجھ ہی سے مدد طلب کرتے ہیں ۔ اور آگے سوال ہے اھدنا الصراط المستقیم چلا ہم کو سیدھے راستے پر ۔ اس سورة کا نام شافیہ بھی ہے۔ یعنی شفا دینے والی۔ حقیقتا تو شفا دینے والی ذات اللہ تعالیٰ کی ہے۔ مگر اس میں اللہ تعالیٰ نے برکت رکھی ہے جس کی وجہ سے روحانی اور جسمانی بیماریوں سے شفا ملتی ہے بخاری شریف صفحہ ٣٠٤ میں روایت آتی ہے کہ آنحضرت (صلی اللہ علیہ وآلہ وسلم) نے ایک محاذ پر صحابہ کرام (رض) کی ایک جماعت کو روانہ فرمایا کامیابی کے بعد جب واپس ہوئے رات ایک چھوٹے سے قصبے میں ہوئی وہاں رات گزارنے کا ارادہ کیا لیکن وہاں کے لوگوں نے ان کی مہمانی سے انکار کیا کہ ہم صابیوں کو یہاں نہیں رہنے دیں گے ۔ جس طرح آج کل اہل حق کو وہابی کہتے ہیں اور وقت اہل حق صابی کہتے تھے۔ کہنے لگے کہ ہم نے صابیوں کو یہاں نہیں رہنے دینا۔ اس طرح سمجھو جس طرح ہمارے ساتھی تبلیغی جماعت والے بعض قصبات میں جاتے ہیں تو وہ لوگ ان کے بسترے اٹھا کر باہر پھینک دیتے ہیں اور ان کو ہاتھوں اور کانوں سے پکڑ کر باہر نکال دیتے ہیں کہ لوگ ان کی باتیں سن کر متاثر ہوں گے اور ہمارے ریوڑ سے نکل جائیں گے۔ ورنہ یہ لوگ ان سے کچھ مانگتے تو نہیں ہیں۔ اپناکھانا اور اپنا پینا ہے۔ اللہ تعالیٰ ان کو زیادہ سے زیادہ کام کرنے کی توفیق عطافرمائے آمین۔ بہرحال انہوں نے صحابہ کرام (رض) کو قصبے سے باہر نکال دیا چونکہ اندھیرا تھا انہوں نے قصبے کے قریب ہی ڈیرہ لگالیا کہ رات گزار لیں اور صبح کو چلیں گے اتفاق ایسا ہوا کہ قصبے کے بڑے سردار کو زہریلے قسم کے موذی جانور نے ڈنگ مارا۔ روایت میں ہے کہ فسعوالہ نکل شیء انہوں نے ہر طرح کی کوشش کی یعنی وہاں جتنے چھومنتر اور دم کرنے والے تھے کسی کا بس نہ چلا۔ مجبور ہو کر صحابہ کرام (رض) کے پاس آئے کہ ہمارے سردار کو کوئی زہریلی چیز لڑگئی ہے کیا تم میں کوئی دم کرنے والا ہے ؟ حضرت ابوسعید خدری (رض) نے کہا کہ ہاں دم کریں گے مگر تیس بکریاں لیں گے۔ تیس اس لئے کہا کہ یہ آدمی تیس تھے ہر ایک کو ایک ، ایک آجائے گی۔ چنانچہ ان کے ساتھ گئے اور سورة فاتحہ پڑھ کردم کیا کانھا نشط من مقال گویا کہ اس کو گرہ سے کھول دیا ہے۔ یعنی اس کو اس طرح محسوس ہوا کہ کبھی تکلیف ہوئی ہی نہیں ہے۔ فرمایا شرط پوری کرو کہ تیس بکریاں ہمارے حوالے کرو۔ چناچہ تیس بکریاں گن کر ان سے لیں ۔ مگر تقسیم نہ کیں کہ مدینہ طیبہ میں جاکر آنحضرت (صلی اللہ علیہ وآلہ وسلم) سے دریافت کریں گے اگر ہمارے لئے جائز ہوں گی تو تقسیم کریں گے ورنہ مالکوں کو واپس کردیں گے۔ مدینہ طیبہ پہنچ کر آنحضرت (صلی اللہ علیہ وآلہ وسلم) سے دریافت کیا آپ (صلی اللہ علیہ وآلہ وسلم) نے فرمایا ” ان احق مااخذتم علیہ اجرا کتاب اللہ “ بیشک جن چیزوں پر تم اجر لیتے ہو ان میں اللہ تعالیٰ کی کتاب زیادہ حق رکھتی ہے کہ تم اس پر اجرلو۔ اور فرمایا کہ اس مزدوری میں سے میرا بھی حصہ نکالو۔ آپ (صلی اللہ علیہ وآلہ وسلم) کا یہ فرمانا حرص اور لالچ نہ تھا بلکہ صرف ان کا وہم دور کرنا مقصود تھا کہ یہ تم نے کوئی گناہ نہیں کیا اگر اس میں کسی قسم کا شبہ ہوتا تو حضور (صلی اللہ علیہ وآلہ وسلم) یہ نہ فرماتے کہ مجھے بھی حصہ دو ۔ اس روایت کے پیش نظر تمام فقہاء کرام رحمۃ اللہ علیہم کا اس بات پر اتفاق ہے کہ اگر کوئی تعویذ گنڈے اور دم کرنے پر اجرت لینا چاہے تو لے سکتا ہے۔ کوئی گناہ نہیں ہے۔ تو اس سورة کو شافیہ اس لئے کہتے ہیں کہ اس میں اللہ تعالیٰ نے شفا رکھی ہے بسم اللہ الرحمن الرحیم کا معنی ہے کہ شروع کرتا ہوں اللہ تعالیٰ کے نام سے جو بڑا مہربان اور نہایت رحم کرنے والا ہے ۔ یہاں چونکہ کتاب کو شروع کرنا ہے اس لئے شروع کا فعل نکالتے ہیں ورنہ جس کام کے لئے پڑھو گے وہی فعل نکالیں گے مثلاً کھانا کھانا ہے تو وپاں اکل کا فعل نکالیں گے اور ترجمہ ہوگا کہ میں کھانا کھاتا ہوں اللہ تعالیٰ کے نام سے جو بڑا مہربان اور نہایت رحم کرنے والا ہے۔ اور اگر کچھ پینا ہے تو اشرب کا فعل نکالیں گے کہ میں پیتا ہوں اللہ تعالیٰ کے نام سے اور پڑھنے کے وقت اقرء نکالیں گے کہ میں پڑھتا ہوں اللہ تعالیٰ کے نام سے جو بڑا مہربان اور نہایت رحم کرنے والا ہے۔ شاہ عبدالعزیز محدث دہلوی (رح) فرماتے ہیں کہ رحمن اسے کہتے ہیں جو بغیر مانگنے اور سوال کرنے کے دے اور رحم اسے کہتے ہیں جو مانگنے اور سوال کرنے کے بعد دے۔ تو اللہ تعالیٰ رحمن ہے کہ ہمیں جو کچھ ملا ہے وجوہ ملا ہے، کان ملے ہیں ، آنکھیں ملی ہیں ، ناک ملا ہے، دل ، دماغ ملا ہے ، زبان ملی ہے، سب کچھ اس نے بغیر مانگنے کے دیا ہے اور کتنی چیزیں ہیں جو اس نے بن مانگے عطا فرمائی ہیں۔ کیونکہ جب اس نے عطا کی ہیں ہمیں اس وقت سوجھ بوجھ ہی نہیں تھی کہ مانگتے اور مانگنے پر بھی عہی دیتا ہے کہ رحیم بھی ہے اس کے سوا کوئی نہیں دے سکتا ۔
Sidebar
Page Thumbnails